«Մարտիրոս Սարյան․ ծանոթ և անծանոթ դեմքեր» ցուցադրության ավարտին Գրականության և արվեստի թանգարանում տեղի կունենա լինոփորագրության աշխատարան 6-13 տարեկան երեխաների համար։

 

Ծրագրի ընթացքում՝ 

•Կծանոթանանք Սարյանի՝ Չարենցի կտավի առեղծվածային պատմությանը,
• Կդիտենք «Մարտիրոս Սարյան․ ծանոթ և անծանոթ դեմքեր» ցուցադրությունը զբոսավարի ուղեկցությամբ,
• Լինոփորագրության աշխատարանի միջոցով կստեղծենք Չարենցի դիմանկարի մեր տարբերակը,
• Կամփոփենք Սարյանի 145-ամյակին նվիրված ժամանակավոր ցուցադրությունը՝ մեզ հետ տանելով մեր ստեղծագործությունները։

 

 

Մասնակիցները լինոլիումի վրա փորագրված պատկերը հատուկ տեխնիկայով կվերատպեն թղթի վրա՝ իբրև Չարենցի դիմանկարը փրկելու սեփական փորձ։

Աշխատարանի ղեկավար՝ Սարգիս Հովհաննիսյան
Ծրագրի տևողությունը՝ 1ժամ 30 րոպե

Գրականության և արվեստի թանգարանը սիրով հրավիրում է կոմպոզիտոր, խմբավար, ազգագրագետ և մանկավարժ, երաժշտության տեսաբան Սպիրիդոն Մելիքյանի 145-ամյակին նվիրված ցուցադրության բացմանը հուլիսի 2-ին՝ ժամը 11։00-ին։

 

Կոմիտասի աշակերտ և օգնական Սպ․ Մելիքյանը շարունակեց իր բազմաշնորհ ուսուցչի ստեղծած առաջադիմական ավանդույթը՝ տևական ջանքեր գործադրելով հայ ժողովրդական երգերի ու պարերի հավաքման, ձայնագրման, գեղարվեստական մշակման և ուսումնասիրության ուղղությամբ։ Սպ․ Մելիքյանը համարվել է հայ երաժշտական ֆոլկլորի խոշոր գիտակը Կոմիտասից հետո։ Նա տարված էր հայ պրոֆեսիոնալ երաժշտության զարգացման լայն հեռանկարով և երաժշտական մշակույթի հանրահռչակման երազանքով, որին էլ միտված էր Թիֆլիսում, Երևանում, Մոսկվայում ծավալած նրա արգասավոր գործունեությունը։

 

«Սպիրիդոն Մելիքյան-145» ցուցադրության շրջանակում կներկայացվի կոմպոզիտորի գործունեության և թողած երաժշտական ժառանգության խոսուն նմուշները՝ ինքնագիր նամակներ, նոտագրություններ, երաժշտական ուսումնասիրություններ, լուսանկարներ, անձնական իրեր, որոնք պատկանում են ԳԱԹ-ի հավաքածուին։
Ցուցադրության համադրող՝ Ցողիկ Բեքարյան, Երաժշտական բաժնի վարիչ

 

Ցուցադրությունը կգործի մեկ ամիս:

Գրականության և արվեստի թանգարանը, համագործակցությամբ Ալ․ Սպենդիարյանի անվան օպերայի և բալետի ազգային ակադեմիական թատրոնի Երիտասարդական օպերային ծրագրի, ներկայացնում է համերգային երեկո՝ Գրականության և արվեստի թանգարանի Կոմիտասի անվան դահլիճում:

 

Համերգը տեղի կունենա հունիսի 20-ին՝ ժամը 18։00-ին։

Կհնչեն հայ և արևմտաեվրոպական կոմպոզիտորների ստեղծագործություններ։ Ծրագրի ղեկավար՝ Լ․ Ջավադյան։։

 

«Մարտիրոս Սարյան․ ծանոթ և անծանոթ դեմքեր» Ժամանակավոր ցուցադրություն Գրականության և արվեստի թանգարանում՝ նվիրված Մարտիրոս Սարյանի ծննդյան 145-ամյակին

 

Ցուցադրության շրջանակում կներկայացվի Մարտիրոս Սարյանի՝ ԳԱԹ-ում պահվող ամբողջական հավաքածուն՝ կտավներ, գրաֆիկական աշխատանքներ, լուսանկարներ և վավերագրեր, որոնց զգալի մասն առաջին անգամ է ցուցադրվում։ Հավաքածուի գեղարվեստական մասն ընդգրկում է հայ գրողների, մշակույթի գործիչների՝ ծանոթ և անծանոթ շուրջ 60 դիմանկար։

Ցուցադրության բացումը տեղի կունենա հունիսի 10-ին՝ ժամը 16։00-ին։
Այն կգործի մինչև հուլիսի 10-ը։

Սիրով սպասում ենք։

 

Մուտքը՝ ցուցադրության տոմսով

Գրականության և արվեստի թանգարանում մայիսի 31-ից հուլիսի 30-ը կգործի «Հիշողության սլաքներ» բացառիկ ցուցադրությունը։ Առաջին անգամ կցուցադրվեն հայ մեծերի՝ գրականության, երաժշտության, թատրոնի և կինոյի երևելիների անձնական ժամացույցները, որոնցից յուրաքանչյուրի սլաքները կանգ են առել հիշողության մի ակնթարթում․․․ 

Ցուցադրվող 60 ժամացույցներից միայն մեկի սլաքներն են բաբախում առ այսօր՝ կամրջելով անցյալ ու գալիք հիշողությունները։ 

Ժամանակավոր ցուցադրության շրջանակում կներկայացվեն Մ․ Նալբանդյանի, Հ․ Թումանյանի, Ա․ Բակունցի, Վ․ Փափազյանի, Բ․ Կանաչյանի, Մ․ Սարյանի և մյուս մեծերի ժամացույցները՝ հիշողության սլաքներով։

Նախագծի հովանավոր` 𝐀𝐖𝐈 𝐢𝐧𝐭𝐞𝐫𝐧𝐚𝐭𝐢𝐨𝐧𝐚𝐥
Գործընկերներ` Հովհաննես Թումանյանի թանգարան, Մարտիրոս Սարյանի տուն-թանգարան

 

Մուտքը՝ ցուցադրության տոմսով

Եղիշե Չարենցի անվան Գրականության և արվեստի թանգարանի տնօրինությունը հայտարարում է, որ թանգարանի ֆոնդերի համալրման նպատակով պատրաստ է ձեռք բերել 19-20 դարերի հայ գրականությանը, թատերարվեստին, կինոարվեստին և երաժշտությանն առնչվող վավերագրեր, անհատական արխիվներ, մշակութային գործիչների անձնական իրեր, մշակութային կազմակերպությունների արխիվներ, 19-20 դարերի լուսանկարներ, գեղարվեստի գործեր։

Ներկայացված բոլոր նմուշները կգնահատվեն թանգարանի գնահատու-ֆոնդային հանձնաժողովի կողմից՝ ըստ ընդունված չափորոշիչների։

Գրականության և արվեստի թանգարանը միանում է երկօրյա մշակութային տոնին: Այս տարի «Թանգարանների գիշեր» համաեվրոպական միջոցառումը կանցկավվի մայիսի 17-ին, իսկ մայիսի 18-ին կնշվի Թանգարանների միջազգային օրը «Թանգարանների ապագան արագ զարգացող հայամնքերում» խորագրի ներքո:

 

ՄԱՅԻՍԻ 17  

10:00-24:00 - Հիմնական ցուցադրություն

10:00-24:00 - Ժամանակավոր ցուցադրություն՝ «Վահան Տերյանը՝ ուսանող»․ կցուցադրվեն Վահան Տերյանի ուսանողական շրջանին վերաբերող և թանգարանում պահվող արխիվային վավերագրեր

17:00 - «Պատում՝ մեկ իրի․ Կոմիտաս վարդապետի սրինգը» ժամանակավոր ցուցադրության բացում․ կներկայացվեն Կոմիտասի սրինգը (բլուլը) և դրա մասին պատմող նրա ինքնագիր հոդվածը

20:00-20։40 - «ԿինոՋազ․ էկրանից՝ բեմ»․ Երևանի Կ․ Սարաջյանի անվան երաժշտական դպրոցի սաների մասնակցությամբ ջազային-անսամբլային երաժշտության երեկո

 

 

ՄԱՅԻՍԻ 18

10:00-18:00 - Հիմնական ցուցադրություն 

 

Մայիսի 17-ին և 18-ին թանգարանի մուտքն ԱՆՎՃԱՐ է։

Մայիսի 17-ին թանգարանը բաց կլինի մինչև կեսգիշեր։

 

 

Հարգելի ուսումնասիրողներ,

տեղեկացնում ենք, որ Զապել Եսայանի՝ ԳԱԹ-ում պահվող արխիվային նյութերը ժամանակավորապես չեն սպասարկվում՝ վերամշակման փուլում լինելու պատճառով։ Նյութերի հասանելիության վերականգնման վերաբերյալ լրացուցիչ տեղեկատվություն կտրամադրվի առաջիկայում։

Ապրիլի 23-ին՝ ժամը 13։00-ին, սիրով հրավիրում ենք ինտելեկտուալ գրող Վահան Տերյանի 140-ամյակին նվիրված «Տերյանը՝ ուսանող» խորագրով ժամանակավոր ցուցադրության բացմանը Գրականության և արվեստի թանգարանում։ 

 

Վ․ Տերյանի ուսանողական տարիները միայն ակադեմիական կրթություն ստանալու ժամանակաշրջան չէին։ Դրանք նրա անձի, աշխարհայացքի և գրական ոճի ձևավորման ամենաբուռն ու որոշիչ փուլերն էին։ Տերյանը փայլուն, մշտապես զարգացող ուսանող էր, նա ակտիվորեն մասնակցում էր ազգային և երիտասարդական շարժումներին։Բազմաթիվ լեզուների իմացությունը Վ․Տերյանին հնարավորություն տվեց բնագրով կարդալու աշխարհի մեծագույն մտածողների ու գրողների ստեղծագործությունները։ Հանգամանք, որը ձևավորեց մտքի բացարձակ ազատություն, գրական ինքնատիպ ոճ ու լեզու ունեցող գրողին։

Ցուցադրվող վավերագրերը կօգնեն բացահայտել Վ․Տերյանի ուսանողական կյանքի վառ դրվագներն ու ուշագրավ մանրամասները, որոնք հուշում են, թե ինչպիսին պետք է լինի օրինակելի ուսանողը և իսկական մտավորականը։

 

Ցուցադրությունը կգործի մեկ ամիս:

 

Հայ կինոյի օրը Գրականության և արվեստի թանգարանը նշանավորում է նոր գրքի շնորհանդեսով։

Սիրով հրավիրում ենք Ռոբերտ Մաթոսյանի «Ֆրունզիկ Մկրտչյան. չգրված հետադարձ հայացք․․․» գրքի շնորհանդեսին ապրիլի 16-ին՝ ժամը 14։00-ին։
Վավերագրական այս գիրքը մեծանուն արտիստ Ֆրունզիկ Մկրտչյանի չգրված մենախոսությունն է, որը հեղինակը ձայնագրել է ավելի քան 40 տարի առաջ:
Ռոբերտ Մաթոսյանը, լինելով նրա մտերիմ բարեկամներից մեկը, որպես «Ֆիլմ» թերթի խմբագիր տարբեր առիթներով ձայնագրել է արտիստի հանդիպումները, արտերկրի կինոփառատոններում ականատեսն է եղել նրա ջերմ ընդունելությանը, հանդիսատեսի սիրուն ու մեծարմանը:
Գիրքը վավերագրական ուղերձ է հին ու նոր սերնդին, չգրված հետադարձ հայացք, որը հնարավորություն կտա ընթերցողին նորովի բացահայտել և ճանաչել Մհեր Մկրտչյան մարդուն և արտիստին։

 

Ապրիլի 8-ին՝ ժամը 16:30-ին, Գրականության և արվեստի թանգարանում տեղի կունենա «Նովալիս 250» գեղարվեստական ինստալյացիայի և Վ․ Կորգանովի հավաքածուի գերմաներեն վավերագրերի ժամանակավոր ցուցադրության բացումը։

Գերմանական ռոմանտիզմի մեծագույն բանաստեղծ Նովալիսին նվիրված միջոցառումը կազմակերպվում է Գերմանիայի Դաշնային Հանրապետության Սաքսոնիա-Անհալթ երկրամասի Արվեստի հիմնադրամի և գծանկարիչ Սեբասթիան Գերսթենգարբեի հետ համագործակցության շրջանակում։

Մարտի 30-ին, ժամը՝ 16:00-ին, Գրականության և արվեստի թանգարանում «Հայաստանյան ձայներ» նախագիծը հանդես կգա Կոմիտաս վարդապետին նվիրված գրական-երաժշտական միջոցառմամբ:

Ծրագրում նախատեսվում է Կոմիտասի ստեղծագործությունների կատարում.
Սոպրանո՝ «Հայաստանյան ձայներ» երաժշտական նախագծի ղեկավար, միջազգային մրցանակների դափնեկիր Ստեֆանի Քոչարյան
Ասմունք՝ Հայաստանի, Արցախի և Բուլղարիայի գրողների միությունների անդամ, միջազգային գրական մրցանակների դափնեկիր, բանաստեղծ Սոնա Համբարձում
Դաշնամուր՝ Նատալյա Մնացականյան:


Մուտքը՝ թանգարանի տոմսով։

Մարտի 22-ին՝ ժամը 14։00-ին, Գրականության և արվեստի թանգարանում տեղի կունենա թատրոնի և կինոյի շնորհալի դերասան, ռեժիսոր, գեղանկարիչ Վլադիմիր Քոչարյանի ծննդյան 75-ամյա հոբելյանին նվիրված ժամանակավոր ցուցադրության բացում և միջոցառում։
Ցուցադրության բացմանը ներկա կլինի դերասանի կինը՝ դերասանուհի Կարինե Սուքիասյան-Քոչարյանը, և որդին՝ լուսանկարիչ, կինոռեժիսոր Հայկ Քոչարյանը։

 

 

Մարտի 14-ին Գրականության և արվեստի թանգարանում մեկնարկում է Մանուշյանական շաբաթը, որը նվիրված է ֆրանսիական դիմադրության հերոս Միսաք Մանուշյանին։

Միջոցառման ընթացքում կներկայացվի Մանուշյանի կյանքի վերջին երկու նամակներից մեկը, որը նա գրել է Մելինեի քրոջը։ Այս բացառիկ նմուշը առաջին անգամ կցուցադրվի հանրությանը՝ դառնալով կենդանի վկայություն նրա ապրումների և պայքարի մասին։

 

Միջոցառման ծրագիր`

11:00 | Մամուլի ասուլիս
12:00 | Մելինե Մանուշյանի «Միսաք Մանուշյան. ականատեսի աչքերով» գրքի հայերեն թարգմանության շնորհանդես և պանելային քննարկում
12:40 | «Մանուշյան...» պիեսի շնորհանդես
13:00 | «Միսաք Մանուշյան. ականատեսի աչքերով» ցուցադրության բացում

Լոս Անջելեսի Արևմտյան թեմի առաջնորդարանում փետրվարի 28-ին, ժամը՝ 19:00-ին տեղի կունենա Հայաստանի Գրականության և արվեստի թանգարանի հրատարակած «Զահրատ-100» բանաստեղծությունների հատընտիրի շնորհանդեսը։ Գիրքը հրատարակվել է Նյու Յորքի գիտությունների ակադեմիայի պատվավոր անդամ դոկտոր Յակոբ Այնթապլեանի մեկենասությամբ: Շնորհանդեսին զեկույցով հանդես կգան լեզվաբան դոկտոր -պրոֆեսոր Արտեմ Սարգսյանը և դոկտոր-պրոֆեսոր Յակոբ Այնթապլեանը:

Գրականության և արվեստի թանգարանը միանում է ԲՈՒՔՈՒԲՈՐԱՆ գրատոնին «Անանձնական անձնական էջեր» ցուցադրությամբ, որի բացումը տեղի կունենան ս.թ. փետրվարի 22-ին, ժամը՝ 14:00:

Հովհաննես Թումանյանի ծննդյան օրը Գրականության և արվեստի թանգարանը տոնելու է թանգարանի ֆոնդերից առանձնացված գրքային ընծայագրերի ցուցադրությամբ։ Այս ընծայագրերը առանձնանում են իրենց հետաքրքիր բովանդակությամբ, ինքնատիպ ձևավորումներով, նրբագեղ շեշտադրումներով, առանձնահատուկ ձեռագրերով և անկրկնելի ոճով՝ բացահայտելով գրական ժառանգության անկեղծ ու ջերմ էջերը։ 

Ցուցադրությունը եզակի հնարավորություն է բացահայտելու, թե ինչ գրքեր էին նվիրում միմյանց հայ, արևմտահայ և այլազգի նշանավոր մտավորականները՝ վերածելով ընծայագրերը հիացմունքի և երախտագիտության խոր արտահայտման։

Այցելեք Գրականության և արվեստի թանգարան՝ ծանոթանալու ընծայագրման և գիրք նվիրելու արվեստին և բացահայտեք, թե ինչպես կարելի է գրքի նվիրատվությունը դարձնել ոչ միայն հիշարժան ժեստ, այլև ջերմ հարաբերությունների խորհրդանիշ։

 

Փետրվարի 15-ին՝ սիրահարների բարեխոս Սուրբ Սարգսի տոնին, Գրականության և արվեստի թանգարանն ի նշանավորումն մեծանուն քնարերգու Վահան Տերյանի ծննդյան 140-ամյակի՝ գեղեցիկ անակնկալ է պատրաստել սիրահարների համար։

Թանգարանում դրված տուփից հանելով բացիկը՝ դուք հնարավորություն կունենաք տերյանական բառերով սիրային խոստովանություն կարդալու ձեր սիրելիի համար:

Սիրով հրավիրում ենք տոնելու Սուրբ Սարգսի տոնը Գրականության և արվեստի թանգարանում, վերապրելով տերյանական քնքուշ ու երազային սիրո մթնոլորտը, որտեղ յուրաքանչյուր խոսք դառնում է սիրո խոստովանություն։

ԳԱԹ-ն այս տարի միացել է նաև «Բուկինիստ» գրախանութի «Գաղտնի գրքասեր» ծրագրին: Ձեր սիրելիին գիրք նվիրելու դեպքում անվճար կստանաք տերյանական էջանիշ, որը փետրվարի 15-ին և 16-ին թանգարան ներկայացնելիս անվճար շրջայցի հնարավորություն կունենաք: