Նշանավոր գրող, դրամատուրգ և հասարակական գործիչ Դերենիկ Դեմիրճյանի տուն-թանգարանը հիմնադրվել է 1977 թվականին Երևանի այն բնակարանում, որտեղ 1929 թվականից մինչև իր մահը ապրել է նշանավոր գրողը (1877-1956): Գրականության և արվեստի թանգարանի մասնաճյուղն է: Ունի 670 հիմնական և գրեթե նույնքան գիտաօժանդակ նյութեր, որոնք լավագույնս ներկայացնում են գրողի անցած բազմամյա ստեղծագործական ուղին:

Տուն-թանգարանը բաղկացած է հուշային երեք սենյակներից և մեկ ցուցասրահից: Առաջին սենյակն ամփոփում է գրողի կյանքի և գործունեության վաղ շրջանը, երկրորդը նրա աշխատասենյակն է, իսկ երրորդ սենյակն ընդգրկումէ նրա գրական-հասարակական գործունեության հասուն շրջանը: Ցուցասրահում առավելապես ներկայացված են Դեմիրճյան-թատերագիրն ու նրա երկերի բեմադրությունները ներկայացնող լուսանկարներ: Գրողի անձնական իրերի մեջ ցուցադրվում է նաև նրա ջութակը, որը ստրադիվարուսյան դպրոցի եզակի նմուշ է:

Տուն-թանգարանի նյութերի հիման վրա ստեղծվել են հեռուստատեսային և ռադիո հաղորդումներ: Այստեղ պարբերաբար կազմակերպվում են գրական-թատերական ցերեկույթներ, հանդիպումներ, գրքերի շնորհանդեսներ, քննարկումներ` նվիրված թե՛դասական գրողի կյանքին ու ստեղծագործությանը և թե՛գրական արդի խնդիրներին ու երևույթներին...